55
1 So (Allah a) Masalinggagaw!
2 I mindao ko Qor´an.
3 Inadn Iyan so manosiya,
4 Na inindao Niyan on so lalag.
5 So alongan ago so olan na sii ko itongan.
6 Na so mangngto a pndonapa, go so manga kayo na mangangalimbabaan siran (ko Masalinggagaw).
7 Na so langit na iniporo Iyan skaniyan, go inadn Iyan so timbangan,
8 Ka ang kano di khapokas ko ontol;
9 Na pakambatanga niyo so kathimbang ko kaontol, go di kano phangorang ko timbangan.
10 Na so lopa na kiyayat Iyan skaniyan sa baba a rk o manga kaadn:
11 Katatagoan sa manga onga, go manga korma, a khibobongkosan,
12 Go so manga onga a maroni, a adn a manga inoot iyan ago so mamot.
13 Na anda ko manga limo o Kadnan iyo, i pagongkirn niyo?
14 Inadn Iyan so manosiya a phoon ko botha, a gango, a lagid o kiyomba,
15 Go inadn Iyan so jinn a phoon ko kadg o apoy:
16 Na anda ko manga limo o Kadnan iyo, i pagongkirn niyo?
17 Kadnan o dowa a sbangan, go Kadnan o dowa a sdpan!
18 Na anda ko manga limo o Kadnan iyo, i pagongkirn niyo?
19 Biyotawanan Iyan so dowa a kalodan, a gii makambaratmowa:
20 Kaaltan a dowa oto sa rnding; a di makapzmbor:
21 Na anda ko manga limo o Kadnan iyo, i pagongkirn niyo?
22 Pphakagmaw a phoon sa dowa nan so manga tipay, go so manga koralis:
23 Na anda ko manga limo o Kadnan iyo, i pagongkirn niyo?
24 Na rk Iyan so pphlalatas, a miyanga-aadn ko kalodan, a lagid o manga palaw:
25 Na anda ko manga limo o Kadnan iyo, i pagongkirn niyo?
26 Oman i matatago ko lopa na khada;
27 Na aya bo a khalamba na so dhat o Kadnan ka, - a Khirk ko kabsaran, ago so kapangalimo: -
28 Na anda ko manga limo o Kadnan iyo, i pagongkirn niyo?
29 Makapphamangni Rkaniyan so zisii ko manga langit go so lopa: Oman gawii na Skaniyan na zisii ko btad Iyan!
30 Na anda ko manga limo o Kadnan iyo, i pagongkirn niyo?
31 Phamagitongn Ami skano dn, hay dowa a kappndan (a manga manosiya ago manga jinn)!
32 Na anda ko manga limo o Kadnan iyo, i pagongkirn niyo?
33 Hay kasamasama o manga jinn, go manga manosiya! O khagaga niyo a kalambasa niyo ko piphisopisokan o manga langit, go so lopa, na lambasa niyo. Di niyo malambas odi misabap sa bagr!
34 Na anda ko manga limo o Kadnan iyo, i pagongkirn niyo?
35 Mbotawanan rkano so kadg o apoy, go so bl, na di niyo dn marn:
36 Na anda ko manga limo o Kadnan iyo, i pagongkirn niyo?
37 Na amay ka maopak so langit na mbaloy a paras a obarobar, a lagid o kobal a mariga:
38 Na anda ko manga limo o Kadnan iyo, i pagongkirn niyo?
39 Na sa alongan oto na di ipagiza ko manosiya so dosa niyan, go di ipagiza ko jinn:
40 Na anda ko manga limo o Kadnan iyo, i pagongkirn niyo?
41 Makikilala so manga baradosa sabap ko manga tanda iran: Na gii nggagandrn sii ko manga ombonombonan, go so manga parapara!
42 Na anda ko manga limo o Kadnan iyo, i pagongkirn niyo?
43 Giyaya so naraka Jahannam a so phagongkirn skaniyan o manga baradosa:
44 Makapphagaloyan siran ko lt iyan go lt o phlikabo a ig, a sangat a mayaw!
45 Na anda ko manga limo o Kadnan iyo, i pagongkirn niyo?
46 Na adn a bagian o taw a inikalk iyan so kapakatindg iyan ko hadapan o Kadnan iyan, a dowa a sorga:
47 Na anda ko manga limo o Kadnan iyo, i pagongkirn niyo?
48 A romarangiran.
49 Na anda ko manga limo o Kadnan iyo, i pagongkirn niyo?
50 Katatagoan a dowa oto sa dowa a bowalan a pphamangondas.
51 Na anda ko manga limo o Kadnan iyo, i pagongkirn niyo?
52 Katatagoan a dowa oto sa mbarambarang a onga, a ndodowa soson.
53 Na anda ko manga limo o Kadnan iyo, i pagongkirn niyo?
54 Gii siran zasanda sandang ko manga igaan, a so manga didalm iyan na sotra a makapal: Na so kaphropoa ko onga o dowa a pamomolan na marani.
55 Na anda ko manga limo o Kadnan iyo, i pagongkirn niyo?
56 Katatagoan oto sa (manga bai a) manga thatangka i kaylay, a da a miyakabatal kiran a manosiya ko onaan o manga karoma iran, antawaa jinn.
57 Na anda ko manga limo o Kadnan iyo, i pagongkirn niyo?
58 Lagid oba siran montiya a Yaakot, go Marjan.
59 Na anda ko manga limo o Kadnan iyo, i pagongkirn niyo?
60 Ba adn a imbalas ko kaphiyapiya a rowar ko kaphiyapiya?
61 Na anda ko manga limo o Kadnan iyo, i pagongkirn niyo?
62 Na adn a salakaw roo pn a dowaa sorga.
63 Na anda ko manga limo o Kadnan iyo, i pagongkirn niyo?
64 Miyagadogadong a dowa oto.
65 Na anda ko manga limo o Kadnan iyo, i pagongkirn niyo?
66 Katatagoan a dowa oto sa dowa a bowalan, a mipapantos.
67 Na anda ko manga limo o Kadnan iyo, i pagongkirn niyo?
68 Katatagoan a dowa oto sa manga onga, go korma, go dalima.
69 Na anda ko manga limo o Kadnan iyo, i pagongkirn niyo?
70 Katatagoan oto sa (manga bai a) manga pipiya (i parangay), a manga tataid.
71 Na anda ko manga limo o Kadnan iyo, i pagongkirn niyo?
72 A manga lalano, a khigigibonn ko manga lamin,
73 Na anda ko manga limo o Kadnan iyo, i pagongkirn niyo?
74 Daa miyakabatal kiran a manosiya, ko onaan o manga karoma iran antawaa jinn.
75 Na anda ko manga limo o Kadnan iyo, i pagongkirn niyo?
76 Gii siran zasanda sandang ko manga ontoda, a gadong, go manga paramadali, a manga tatanos.
77 Na anda ko manga limo o Kadnan iyo, i pagongkirn niyo?
78 Maporo so ngaran o Kadnan ka, a Khirk ko kabsaran, ago so kapangalimo!